BAGUIO CITY-Nadangran ti pito nga idibidual, pakairamanan ti driver, kalpasan a naaksidente ti nagluganan dagitoy a truck ti basura ti General Services Office (GSO) sadiay Asin Rd., San Luis Village Barangay ditoy Baguio City itay laeng agsapa.
Nabigbig ti driver ti truck a ni Eddie Malidom Endeken, ti dua a helper daytoy a da Benjamin Buyucan Dumahay kenni Hilatario Tiggangay Tombalu.
Nadunor metlaeng dagiti uppat a volunteers a da Danny Bataag Sumakey, Geovani Saliem Yangyang, Louie Ligawad Cuyao kenni Rogelio Biluen Boedilla.
Maibasar iti report, pasalog ti truck iti nasao a lugar idi narikna ti driver nga addaan depekto ti makina ti lugan agingga a naawanan daytoy iti kontrol a nangitunda iti panakaidungpar ti truck iti nasungadna a riprap ken poste iti kuryente.
Nadadael met ti sumagmamano a paset ti garbage truck.
Nupay kasta, adda itan iti natalged a kasasaad ti driver ken ti ennem a kakadwa daytoy. (with Bombo Charles Nikko Limon)
