7 manipod iti 54 a nagkandidato kadagiti nagduduma a posisyon iti Baguio City ti saan a nakaisumitir iti Statement of Contributions and Expenditures da makabulan kalpasan ti 2025 Midterm Elections idi May 12.
Iti panakiuman iti Bombo Radyo kenni Atty. John Paul Martin,election officer iti Commission on Elections-Baguio, 47 laeng ti nakakamakam a mangisumitir iti SOCEda a pakairamanan iti 6 manipod kadagiti nagkandidato iti kina-kongresista, 3 iti kina-mayor, 2 iti kina-bise mayor, ken 36 kadagiti nagtaray a konsehal.
Sigun kenni Atty. Martin, maysa a napintas a damag ta amin dagiti nabutusan ket nakaisumitir iti nasao a dokumento rason nga amin dagitoy ket mabalin nga agtugaw kadagiti pwesto a nangabakanda.
Kabayatanna, inlawlawag ti opisyal nga awananen iti bileg dagiti lokal nga opisina iti poll body nga umawat pay kadagiti maisumitir nga Statement of Contributions and Expenditures(SOCE) maitunos iti resolusyon a mangibagbaga a ti panangipila iti nasao a dokumento ket saan a mailaylayon rason a saandan nga umawat kadagiti kumamakam kalpasan ti deadline 5PM idi June 11.//Bombo Rob Dominguez
