BAGUIO CITY – Naibilin ti panagpalawag dagiti pito nga establisimiyento ditoy siudad ti Baguio kalpasan a naduktalan a nangatngato ti presyo ti lakoda a face shields no idilig iti naituding nga Suggested Retail Price (SRP).
Nakalanad ti pammilin iti letters of inquiry (LOI) nga inruar ti Department of Health-Cordillera, Department of Trade and Industry – Cordillera ken Baguio City Permits and Licensing Division.
Kasaruno daytoy ti inspeksion nga insayangkat dagiti nasao nga ahensia kadagiti pagtagilakuan ditoy siudad nga agilaklako ti face shields.
Panggep ti inspeksyon a maipasigurado a matungtungpal ti SRP ti face shields.
Nakalanad iti LOI ti panangisumitir dagiti pito nga establishimiyento iti explanation letter a naglaon iti rason ti overpricing dagitoy.
Sumango met iti pannusa dagiti establishimiyento nga agtultuloy a manglabsing iti SRP ti face shields.
Kabayatanna, nakatungpal met dagiti 12 a dadduma pay nga etablishimiyento iti SRP ti face shields a P26-P50.
