BAGUIO CITY – Pinadayawan ti Police Regional Office Cordillera (PROCOR) dagiti pito a pulis ti rehion a nakastrek iti Top 10 ti NAPOLCOM Examinations iti entero a pagilian.
Indauluan da NAPOLCOM – Cordillera Regional Director Editha Puddoc ken PROCOR Regional Director PCSupt. Elmo Francis Sarona ti panakaipaay dagiti nasao a pammadayaw idi kalman gapu iti outstanding achievement dagitoy.
Balligi dagitoy a nageksamin para iti Senior Police Officer ken Police Officer idi 2016 ken ita a 2017.
Nabigbig dagitoy a da PO2 Joven Cayabas Pulano ti Mt. Province Provincial Crime Laboratory, PO1 Elynor Chrisma Valeros ti Bangued MPS, PO2 Francisco Ayeo-eo Pespes ti BCPO-Station 6, PO2 Denver Vicente Dolin ti Regional Public Safety Battalion, PO2 Rachelle Grace Cabalo Baruela ti San Juan MPS, SPO1 Elijanuaren Marcos Alibuyog Paloy ti Kabayan MPS ken ni PO1 Marivic Einjansantos Azurin ti BCPO-City Public Safety Company.
Innayon pay ti organisasyon a ti nasao a balligi dagiti pulis ti Cordillera ti mangipakpakita iti nangato a degree ti competence ken aptitude dagitoy.
