BAGUIO CITY – Agtalinaed ti 70 percent seating capacity kadagiti parapubliko a jeep ditoy siudad ti Baguio ngem nasken nga agtalinaed ti plastic barriers tapnu maipasigurado ken maksayan ti risgo iti panakaiwaras ti COVID-19 kadagiti pasahero.
Inwaragawag daytoy ni Atty. Althea Alberto, Executive Assistant IV ti City Mayor’s Office.
Dinakamatna nga addan to ti maipaulog nga executive order wenno pammilin mainaig iti seating capacity dagiti jeep iti siudad.
Sigun kenkuana, naibilin ti regular a panang-disinfect dagiti drivers dagiti jeep kadagiti plastic barriers iti uneg ti jeep dagitoy ken mabalin nga agalada ti disinfectant materials iti City Disaster Risk Reduction and Management Office.
Naamuan a natalantan ti pakaseknan iti plastic barriers iti panakitaripnong ni Atty. Alberto kadagiti maseknan nga opisina idi kanikadua.
Innayonna nga uray pay inwaragawag ti kaudian a memorandum circular ti Land Transportation Office a mabalin a maikkat ti plastic barriers ket nagdesisyonda nga agannad ken pagtalinaeden ti plastic barriers para iti kinatalged dagiti pasahero iti siudad.
Kabayatana, nagpalawag ti mayor ti Baguio no apay a tarigagay ti lokal a gobyerno nga agtalinaed ti 70% seating capacity with plastic barriers kadagiti parapasahero a jeep ditoy siudad.
Sigun iti mayor, daytoy ket tapno saan la unay a madagsenan dagiti driver ken dagiti operator dagiti jeep nangruna ta nangina ita ti krudo.
Kinunana nga iti agdama ket maipatpatungpal ti 70% operational capacity ditoy siudad nupay adda daytoy iti Alert Level 3.
Maibasar iti pagalagadan iti Alert Level 3, nasken a maipatungpal ti 50% capacity kadagiti parapasahero a jeep ngem kinuna ti mayor a saan a kabaelan ti siudad nga ipatungpal daytoy gaputa marigatan dagiti driver.
Dinakamatna a kasapulan a maipatungpal ti 70% capacity nupay linabsing ti siudad ti pagalagadan iti ALert Level 3 tapno matulongan dagiti drivers ken operators.
Nupay kasta, ur-urayenda ti opisyal a deklarasyon ti Land Transportation Franchising and Regulatory Board (LTFRB) para iti panakaikkat dagiti plastic barriers kadagiti parapasahero a jeep.
Inlawlawag ti mayor nga iti kanito nga addan ti waragawag ti LTFRB seknan iti panakaikkat dagiti plastic barriers, ipatungpal ti siudad ti 50% seating capacity nga awanan ti plastic barriers.
