BAGUIO CITY–Narisuten ti 70 a tawen a susik iti nagbeddengan dagiti munisipyo ti Bakun, Kibungan ken Kapangan iti probinsia ti Benguet.
Sigun kenni Benguet Vice Governor Johnny Waguis, nagtunos dagiti tallo a munisipyo a manggibus iti susik iti nagbebeddengan dagitoy babaen iti patas a panaggugudwada kadagiti mapagin-inagawan a disso.
Kinunana a nailanad ti desisyon iti settlement agreement iti memorandum of agreement a pinirmaan dagiti opisyales dagiti tallo a munisipyo a sinaksian dagiti panglakayen ken dagiti opisyales ti probinsia iti seremonya a naangay sadiay Palina, Kibungan.
Naamuan nga idi pay Nobyembre ti napalabas a tawen a nangrugi ti konsultasyon para iti panakarisut ti susik dagitoy babaen iti inisyatibo ti provincial board.
Dumanon iti 1,056 nga ektarya ti pagin-inagawan ti Bakun ken Kibungan bayat a 1,663 nga ektarya ti pagin-inagawan ti Kapangan ken Kibungan.
Nakalanad iti napirmaan a katulagan nga agtultuloy ti bileg ti katulagan dagiti tallo a munisipyo iti baet nga agpaso ti termino dagiti agdama nga opisyales dagitoy.
Nakalanad pay iti katulagan a dagiti existing tax declarations wenno titulo ti lote a masarakan kadagiti mapagin-inagawan a disso ket makorektar bayat a dagiti real property taxes ket nasken a mabayadan iti munisipyo nga agdama a nakairehistroan ti sanikua.
Kabayatanna, narisut metten ti susik iti nagbeddengan ti Bokod ken Itogon kalpasan a nagtunos ti dua a paggudwaan ti 12,000 nga ektarya manipud iti pagin-inagawanda a 15,000 nga ektarya bayat a ti nabatbati a 3 nga ektarya ket mapagsasaritaan paylaeng.
