BAGUIO CITY–Mabalinen a kiddawen ti provincial government ken dagiti maseknan a municipal government ti panakaipaluspos ti maiparbeng nga Internal Revenue Allotment (IRA) manipud iti nasyonal a gobyerno a nabayag a saan a naipapaay gapu iti susik iti nagbeddengan dagitoy.
Inwaragawag daytoy ni Benguet Vice Governor Johnny Waguis kasaruno ti panakarisut ti 70 a tawen a susik iti nagbeddengan ti Bakun ken Kibungan; ti Kapangan ken Kibungan ken ti Bokod ken Itogon.
Kinablaawanna dagiti opisyales ken dagiti umili dagiti nasao a munisipyo gapu iti dakkel a naaramidan dagitoy iti panakarisut ti nasao a pakaseknan.
Dinakamatna a ti kaudian a balligi ket bunga iti natibker a liderato dagiti tallo a munisipyo kagiddan ti panangipeksana iti tarigagayna a tuladen dagitoy dagiti dadduma pay a lokal a gobyerno.
Innayonna nga agserbi daytoy a kapatgan a sagot para kadagiti agdama ken masungad a henerasyon.
Sigun pay kenkuana, ti sumaruno a puntirya ti Committee on Boundary Dispute nga idadauluanna iti Provincial Board ti panakisarita kadagiti lokal a gobyerno ti Atok, Kapangan ken Tublay mainaig kadagiti pagin-inagawan dagitoy a disso.
