Dumanon iti agarup 7,000 a pagadalan iti nagduduma a paset ti pagilian ti nanggsuspender ti face-to-face classes, gapu iti nakaro a kinabara ti panawen.
Segun iti Department of Education (DepEd), impakaammo ti 7,080 manipud iti pakabuklan a bilang a 47,678 a pagadalan ditoy pagilian wenno 14.8% ti pannakasuspende ti in-person classes ken mangipatungpal dagitoy ti alternative delivery modes.
Maipalagip a ti Central Luzon ti kaaduan a naapektaran a pagadalan iti bilang a 1,903, sinaruno ti Central Visayas nga addaan iti 870 ken Western Visayas nga addaan iti 862.
Iti National Capital Region (NCR), 311 a pagadalan ti nangsuspende ti face-to-face classes.
Immunan nga impaay ti Department of Education kadagiti school heads ken local government units (LGUs) ti autoridad a mangsuspende ti face-to-face classes no nakaru ti kinabara ti panawen iti lugar dagitoy, para iti pagimbagan dagiti estudiante ken manursuro.
