BAGUIO CITY – Pagpalpalawagen ti Department of Health (DOH) – Cordillera dagiti drug stores ken grocery stores iti rehiyon Cordillera a saan a nagtungpal iti price freeze kadagiti essential medicines ken basic medical supplies kasaruno ti pakaseknan iti corona virus disease – 2019.
Kasaruno daytoy ti naduktalan a panaglabsing iti Price Act dagiti 72 a drug stores ken grocery stores iti rehiyon a naduktalan iti panagwanawan nga insayangkat ti Cordilera regional offices ti DOH, Department of Trade and Industry, Food and Drug Administration ken Criminal Investigation and Detection Group.
Naduktalan a manipud kadagiti 214 a drug stores ken grocery stores iti rehiyon a nasukimat dagiti nasao nga ahensia ket 72 kadagitoy ti non-compliant wenno saan a nagtungpak iti naituding a suggested retail price dagiti agas ken facemask.
Naamuan nga innem kadagitoy ti masarakan iti Baguio City, sag-14 sadiay Benguet ken Ifugao, walo sadiay Kalinga, 18 sadiay Mountain Province, pito sadiay Abra ken lima sadiay Apayao.
Sigun kenni DOH-Cordillera Legal Officer Atty. Veronica Zandra Sowaken, maipatulodan iti notices dagiti nasao a drug stores ken grocery stores ken maipaayan dagitoy iti lima nga aldaw nga agsungbat wenno agpalawag.