BAGUIO CITY – Dumanon iti 72 nga indibidual ditoy siudad ti Baguio ti nairaman iti ‘validated drug list’ ti Philippine Drug Enforcement Agency (PDEA) ken ti Baguio City Police Office (BCPO).
Sigun kenni PCI Nichomedes Olarte, dadaulo ti Drug Enforcement Unit ti BCPO, 9 kadagitoy ti nakemmeg, 36 ti simmuko, 7 dagiti nagpiyansa bayat a 10 paylaeng ti manarimaan nga an-anupen dagiti operatiba.
Kinunana a posible pay a manayunan ti nasao a listaan iti agtultuloy a panagmonitor ken intelligence gathering ti PNP ken PDEA.
Innayonna nga agtultuloy metlaeng ti panangsarungkarda kadagiti sigud a drug surenderees tapno maipasigurado a saanen dagitoy nga agsubli iti iligal nga aktibidad.
Nupay kasta, inaklonna nga adda latta dagiti drug surenderees dagitoy a nagsubli iti iligal a panagaramat ken panagilako iti iligal a droga pakairaman dagiti innem a nakemmeg dagitoy.
