Inwaragawag ti Department of Health (DOH) a nakailista ti pagilian iti agarup 72,000 a kaso ti Influenza-like illness (ILI).
Maibasar iti datos ti ahensiya manipud Enero 04 agingga Agosto 1, dumanon iti 72,735 ti nailista a kaso ti ILI.
Bimmaba iti 23% no idilig iti 94,399 a kaso a nai-report iti kapada a bulan idi 2025.
Nupay kasta, kinuna ti DOH a ngimmato iti 4,466 ti kaso idi Hulio 5 agingga Hulyo 18, 2026.
Ngimmato daytoy iti 1% no idilig iti 4,442 a kaso idi Hunio 21 agingga Hulio 4.
Kabayatanna, dumanon iti 38 dagiti pimmusay gapu iti nasao a sakit, nababbaba no idilig iti 45 a bilang idi 2025.
Kangatuan ti kaso ti Northern Mindanao, sinaruno ti Calabarzon, ken Davao Region.
Kangrunaan a makapkaptan dagiti ubbing nga atawen iti 5 agingga 14.
Gapu iti dayta, impaganetget ti World Health Organization a ti panagbakuna ti manamnama a mangsalaknib iti nakaro a sakit ken manglapped iti pannakayospital.