Pimmusay ti 74-anyos a Filipino-American idiay San Francisco, California kalpasan nga induron ti padana a pasahero iti paumay a commuter train ti San Francisco Bay area idi Hulyo 1.
Ti biktima ket ni Corazon Dandan, 74-anyos bayat a ti suspek ket ni Trevor Belmont, 49-anyos.
Maibasar iti report ti Bay Area Rapid Transit (BART), timmama ti ulo ti biktima iti tren agingga a natnag.
Naitaray ti biktima iti ospital ngem pimmusay metlaeng gapu iti nakaro a dunor a nasagrapna.
Sigun iti kabagyan ti biktima a ni Alvin Dandan, paawid koma ti biktima kalpasan ti trabahona kas telephone operator iti downtown hotel idi napasamak ti insidente.
Maibasar iti rekord ti pulisya, ti suspek a ni Belmont ket nairaman iti dua pulo ket uppat a kaso a kriminal idiay San Francisco idi 2013.
Iti agdama ket nakabalud ti suspek ken sumangsango daytoy iti kaso a murder ken elder abuse.
Ti biktima ket dimmakel iti pagilian a Pilipinas ken napan idiay Estados Unidos idi tawen 1980’s.
