BAGUIO CITY–Nakemmeg ti maysa a lalaki kalpasan a binagsolna ti landlord daytoy sadiay Purok 3, Pinsao Proper syudad ti Baguio.
Nabigbig ti suspek a ni Atos Balanio, adda iti legal nga edad, laborer ken tubo ti Antipolo a tenant ti biktima.
Nabigbig met ti biktima a ni Ricarido Ramos Mortel, maysa a Filipino-US citizen, 74-anyos ken residente ti nasao a lugar.
Babaen ti tulong ti driver ken kunduktor ti bus a nagluganan ti suspek ket nakemmeg daytoy kalpasan a sinurut dagiti kameng ti Baguio City Police Office -Station 2 agingga sadiay Mexico Pampanga.
Maibasar iti report ti pulisya, naginom iti arak ti biktima ken suspek pakairamanan ti dua pay a tenant iti pagtaengan dagitoy idi inuyaw ti biktima ti suspek isu’t gapu a nakapungtot ti suspek.
Ginundawayan ti suspek a sinerrek ti silid ti biktima ken ditoy a binagsolna ti biktima bayat ti pannaturog daytoy.
Nakasagrap ti biktima iti maysa a bagsol iti barukongna a nangitunda iti ipupusay daytoy.
Iti agdama ket sumangsango iti kaso a murder iti suspek.
