BAGUIO CITY – Balligi a nabakunaan kontra iti COVID-19 dagiti 75 a balud iti Baguio City Jail – Male Dormitory.
Sigun kenni Jail Supt. Mary Ann Tresmanio, warden ti nasao a pagbaludan, dagiti 61 a balud ket senior citizens ken addaan ti comorbidity a nabakunaan idi June 9 babaen iti Sputnik V bayat a dagiti 14 a balud ket nabakunaan idi kalman, August 6 babaen iti Janssen.
Dinakamatna nga adda met ti maysa a balud a nagkedked nga agpabakuna.
Innayonna nga awan me ti napasaran a side effects dagiti nabakunaan a balud ngem agtultuloy ti panangwanawanda kadagitoy.
Imbinglayna pay a nabayag a tartarigagayanda a mabakunaan dagiti balud sadiay isut gapuna a dakkel ti panagyamanda iti lokal a gobyerno ti baguio ken dadduma pay a timmulong para iti panakatungpal ti nasao a panagbakuna.
Kabayatanna, nalpas metten ti panagbakuna kontra iti COVID-19 kadagiti 110 a balud ti Abra Provincial Jail idi kalman a paset ti serbisio ti salun-at ti gobierno probinsial ti Abra.
KABAYATANA, narugyanen ti panangipaay ti City Health Services Office (CHSO) iti bakuna kontra iti COVID-19 kadagiti indibidual nga human immunodeficiency virus (HIV)-positive ditoy Baguio.
Sigun kenni Assistant City Health Officer Dr. Celia Flor Brilliantes, 40 wenno kagudua kadagiti 80 nga HIV-positive iti siudad ti nakaawaten iti completo a bakuna kontra iti COVID-19.
Kinunana a nagrugian ti panangipaayda ti nasao a bakuna kadagiti HIV-positive idi Hunyo agingga Hulyo.
Dinakamatna pay a Pfizer ken Sinovac vaccines ti naipaay kadagiti nasao nga indibidual.
