Manamnama nga agarup 738 a pagadalan manipud kadagiti uppat a rehiyon a buklen ti National Capital Region, Central Luzon, Soccsksargen, ken Cordillera Administrative Region ti mangkanselar iti panagrugi ti klaseda inton Lunes gapu iti epekto ti bagyo a Carina ken ti habagat, sigun iti Department of Education (DepEd).
Maibasar iti datos ti Department of Education (DepEd), 246 a pagadalan ti naireport a nalayos bayat a 425 a pagadalan ti nausar kas evacuation centers nu sadino 64 kadagitoy ket sitatalinaed pay laeng dagiti evacuees.
Immuna met nga impakaamo ni Department of Education Secretary Sonny Angara nga agarup 90 a pampubliko a pagadalan ti mangitantan iti panagrugi ti klaseda nu pay kasta, posible a manayunan daytoy agsipud ta maur-uray pay dagiti daduma a report manipud kadagiti regional offices.
Innayon pay ni Angara nga adda ti discretion wenno desisyon kadagiti pagadalan nu kaanoda nga irugi ti klase dagitoy.
Kabayatanna, impeksa ni President Ferdinand Marcos Jr. a nu mabalbalin ket maituloy ladta ti panagrugi ti klase dagiti estudyante inton Lunes nangruna nu nasayaat ti kondisyon ti pagadalan dagitoy.
