BAGUIO CITY – Ur-urayen paylaeng ti lokal a gobyerno ti La Trinidad, Benguet ti panangaprobar ti Land Transportation Franchising and Regulatory Board (LTFRB) – Cordillera iti kiddawda a panakaipalubos ti panagbiahe ti kanayonan a parapubliko a jeep nga addaan ruta a La Trinidad-Baguio.
Sigun kenni Mayor Romeo Salda, 79 a parapubliko a jeep ti La Trinidad-Baguio ti pinatgan ti LTFRB nga agbiahe manipud iti 90 a bilang a kidkiddawenda.
Kinunana a sumagmamano kadagiti babbarangay ti La Trinidad ti nagkiddaw iti panakanayon dagiti napatgan nga agbiahe iti masakupanda.
Inlawlawagna nga iti panakaipasidong ti Benguet iti Modified General Community Quarantine ket adun a tattao ti rumrumwar iti pagtaenganda.
Gapu iti daytoy, kinuna ti mayor nga agkurkurang latta dagiti lugan ti La Trinidad-Baguio.
Innayon ni Mayor Salda nga 11 laeng a parapubliko a jeep ti La Trinidad, partikular iti Shilan, Pico ken Buyagan nga agparparada iti Slaughter Compound ti napatgan a sumrek iti siudad ti Baguio.
Kinunana nga alternatibo ti pamay-an dagitoy nga agbiahe ken sumrek iti Slaughter Compound tapnu mamintinir ti 11 a jeep iti nasao nga staging area. (-report by Bombo Razced Pagoli)
