BAGUIO CITY – Sumangsango iti kaso a panaglabsing iti RA 9165 wenno Comprehensive Dangerous Drugs Act of 2002 ti walo nga indibidual kalpasan a nakemmegda iti serye ti operasyon nga insayangkat dagiti otoridad ditoy Baguio City ken sadiay La Trinidad, Benguet idi kalman, July 25 agingga iti pasado tengngat rabii ita nga aldaw ti Biyernes, July 26.
Nakumpiskar ti uppat a pakete ti mapapati a shabu manipud kenni Martin Joseph Alvior Cortez, 28-anyos ken sigud a drug surrenderee iti naisayangkat a buy-bust operation kontra kenkuana sadiay Upper Malvar, Aurora Hill Proper.
Nakumpiskar met kenni Rizal Ngilak Pilo, 30-anyos ti dua a pakete ti mapapati a shabu iti naisayangkat a buy-bust operation kontra kenkuana iti uneg ti maysa nga inn sadiay Lakandula Street.
Inserbi met dagiti otoridad ti dua a search warrants sadiay Sariling Sikap, San Carlos Heights kontra iti agkabsat a Freddie Bustarde ken Francis Bustarde a nagresulta iti panakadiskobre ken panakakumpiskar ti lima a pakete ti mapapati a shabu.
Nakemmeg ni Freddie Bustarde bayat nga awan ti kabsatna idi naipatungpal ti search warrants.
Nakemmeg met ni Justin Nicolo Perez Alambra, 20-anyos kalpasan a nakumpiskar kenkuana ti maysa a nabalkot a mapapati a marijuana nga agdagsen ti agarup nasurok 10 grams iti buy-bust operation kontra kenkuana iti sangwanan ti maysa a bangko sadiay Abanao Extension.
Nakumpiskar pay ti uppat a pakete ti mapapati a shabu manipud iti nakemmeg a ni Ana Marie ‘Clarence/Clark’ Moreno Santos, 20-anyos, carrot washer iti buy-bust operation a naisayangkat kontra kenkuana sadiay Km. 5, Pico, La Trinidad, Benguet.
Nakemmeg met ni Ar Jhay Salon Binas, 21-anyos kalpasan a nakumpiskar kenkuana ti innem a pakete ti mapapati a shabu iti buy-bust operation a naisayangkat sadiay Legarda Road.
Nakumpiskar met ti lima a pakete ti mapapati a shabu nga agdagsen ti agarup nasurok 3.5 grams manipud kenni Eduardo ‘Eddie’ Cabonitalia Borce, 58-anyos, caretaker iti naisayangkat a buy-bust operation kontra kenkuana sadiay Lower Quirino Hill.
Nakumpiskar pay ti 23 a pakete ti mapapati a shabu kalpasan nga impatungpal dagiti otoridad ti maysa a search warrant iti pasdek sadiay Block 4, Kayang-Hilltop Barangay kontra iti nakemmeg a ni Vilma ‘Mika/MJ’ Gargabite Adarne, 34-anyos, negosyante ken residente iti nasao a lugar.
Nadiskobre ken nakumpiskar pay manipud kadagiti nakemmeg a drug personalities ti nagduduma a drug paraphernalia. (-with Bombo Brigitte Marcasi, Bombo Charles Nikko Limon, Bombo Nikki Agsiweng)
