BAGUIO CITY – Nakumpiskar ti agarup P19.4-M a gatad dagiti marijuana manipud iti walo a turista, pakairamanan ti maysa nga army reservist ken maysa a menor de edad iti nagsina nga interdiction operations sadiay Bontoc, Mountain Province idi kanikadua, March 7.
Nakumpiskar iti immuna nga operasyon ti 145 a pidaso ti bricks ken tubular forms ti marijuana nga aggatad ti nasurok P16-M a nakakabil iti dadakkel a carton ken nailugan iti maysa a nangisit a Chevrolet.
Nagresulta daytoy iti panakakemmeg dagiti lima nga indibidual a pasahero ti nasao a lugan a nabigbig a da Cpl. Joseph Roy Petilona, 35-anyos, army reservist, residente ti Angeles, Pampanga; Mark Kevin Guzman, 21-anyos, residente ti Quezon City; Niño Acio, 25-anyos, residente ti Tabon, Angeles City; Princess Guma, 18-anyos, residente ti Anunas, Angeles City ken ti kadwa dagitoy a menor de edad a 7-anyos a naipaima kadagiti social workers.
Nakumpiska metlaeng kenni Petilona ti maysa a 9mm pistola, dua a magazines ken 20 a bala ti 9mm ngem naamuan nga issued firearm ti nasao a paltog kas maibasar iti imparang daytoy a dokumento.
Sigun iti PDEA-Cordillera, kabayatan ti pannakaiproseso dagiti dokumento iti umuna nga operasion ket nakaawatda iti impormasion nga adda ti lumabas a kotse dagiti turista a nakaimet met laeng iti marijuana.
Pinagtalinaed dagiti otoridad ti checkpoint operation dagitoy a nagresulta iti panangkumpiskarda iti 27 a pidaso dagiti bricks ken tubular forms ti marijuana nga aggatad ti nasurok P3.3-M ken iti panangkemmegda kadagiti tallo a pasahero.
Nabigbig dagitoy a da Jerald Escanillas, 22-anyos; John Vincent Santos, 20-anyos ken Princess Diana Kling, 21-anyos a bin-ig a residente ti Angeles City, Pampanga.
Nadakamat pay ti nagan a Ryan Joe Courpin a kadwa dagiti tallo ngem nakalibas daytoy.
Naamuan a ti dua a grupo dagiti turista ket nagtaudda sadiay Buscalan, Tinglayan, Kalinga.
Sumangsango metten dagiti nakemmeg a turista iti kaso a panaglabsing iti RA 9165 wenno iti Comprehensive Dangerous Drugs Act of 2002.
