BAGUIO CITY – Malamlamayan ti 8-anyos nga ubing kalpasan a pimmusay kasaruno ti panangiyanod kenkuana ti napegges nga ayos ti Chico River sadiay Brgy. Luplupa, Tinglayan, Kalinga idi kanikadua.
Ti biktima ket grade 2 pupil, ken residente ti Poblacion, Tinglayan, Kalinga.
Maibasar iti inisyal a panagsukimat ti Tinglayan PNP, naamoan a kalpasan ti klaseda ket nagturong ti biktima ken ti dua a kadwana iti nasao a karayan tapnu agdigos.
Nupay kasta, inyanod ti napegges nga ayos ti danum ti biktima isut gapuna a dagus a nagpatulong dagiti kakadwana.
Dagus a nangisayangkat iti search and rescue operations ti Tinglayan PNP, Tinglayan LGU ken dagiti concerned citizens, ken nasarakanda laengen ti biktima nga awanan iti puot sadiay Brgy. Ambato.
Naipaayan daytoy iti first aid sakbay a naiturong iti Tinglayan Rural Health Unit ngem kalpasan ti maysa nga oras ket pimmusay daytoy.
