BAGUIO CITY – Agtultuloy ti agresibo a kampanya ti Commission on Higher Education (CHED) tapnu maallukoy dagiti estudyante iti kolehio nga agpabakuna kontra iti COVID-19 kas paset ti panagsagana iti panakailukat ti limited face-to-face class iti ad-adu pay a kurso.
Iti panakiuman ti Bombo Radyo Baguio, kinuna ni CHED-Cordillera Regional Director Dr. Demetrio Anduyan Jr. nga inton November 4-11 ket isayangkatda ti Regional Higher Education Vaccination Week.
Sigun kenkuana, daytoy ket gaputa iti agdama ket 27.2% paylaeng kadagiti estudyante iti Cordilleras ti nabakunaan kontra iti COVID-19.
Impettengna a ti aktibidad ket paset ti panangiyalikakada iti kinatalged dagiti estudyante a makipaset iti limited face-to-face classes.
Inlawlawagna a nasken a mabakunaan dagiti estudyante gaputa iti panakipaset dagitoy iti limited face-to-face class ket maaddaanda ti panakipulapol kadagiti tattao kadagiti parapubliko a transportasyon, kadagiti personnel dagiti pagadalan ken kadagiti kaklase dagitoy.
Dinakamatna pay a no agkedked latta ti estudyante ken nagannak daytoy iti nasao a bakuna ket agtalinaed ti estudyante iti online class.
Kabayatanna, impannakkel ni Dr. Anduyan nga agarup 97% kadagiti personnel dagiti nagduduma nga unibersidad ken kolehio iti rehion ti naan-anayen a nabakunaan kontra iti COVID-19.
Nupay kasta, kidkiddawenda ti tulong dagiti opisyales iti rehion iti vaccination program para kadagiti estudyante.
