BAGUIO CITY – Natiliwan ti panaglabsing ti walo nga establishimento ditoy Baguio City iti Smoke-Free Baguio Ordinance kabayatan ti panagsukimat ti Smoke-Free Baguio Task Force sadiay Camdas Subdivision, Dizon Subdivision, Bokawkan Road, Magsaysay Road, Slaughterhouse ken iti Triage Area sadiay Convention Center idi rabii ti Biyernes, June 18, 2021.
Sigun kenni Smoke-Free Baguio Project Leader Cecille Agpawa, iti baet ti panaka-ammo dagiti establishimento iti nasao nga ordinansa, nakita iti inspeksion nga adu latta ti aglablabsing iti daytoy.
Gapu iti nasao a banag, insingasingna ti regular ken rinabii nga inspeksion iti masangwanan tapnu ad-adda a mairtengan ti panagtungpal dagiti establishmiento ken iti publiko iti Smoke-Free Baguio Ordinance.
Sagudayen ti nasao nga ordinansa a maipawil ti panagilako ti sigarilyo no awanan ti cigarette permit, maiparit ti panagilako iti ‘per stick’, panagilako ti sigarilyo no adda ti paglakuan iti masakupan ti 100 meters ti absolute ban areas, panagilako ti sigarilyo iti menor de edad, panagsigarilyo kadagiti parapubliko a lugar ken panangipalubos dagiti establishimento iti panagsigarilyo iti saan nga otorisado nga smoking areas.
Mamulta iti P1,000 agingga P3,000 ken maibalud iti agingga tallo a bulan dagiti indibidual nga aglabsing iti ordinansa bayat mamulta iti P2,000 agingga P5,000 ken masuspindir ti business permit dagiti establishimento.
