BAGUIO CITY – Nakailista ti Provincial Social Welfare and Development Office (PSWDO) – Benguet iti dumanon 80 a kaso ti children in conflict with the law (CICL) manipud idi Enero agingga idi May 18.
Sigun kenni Juana Bannawe, dadaulo ti nasao nga opisina, kaaduan a kaso dagiti CICL ket ti panagtakaw, panagpangta ken panagrames.
Kinunana a 11 nga menor de edad nga agtawen iti 13 agingga 17 ti nakaaramid iti kaso a panagtakaw ken kaaduan wenno 15 kadagitoy ket iti munisipyo ti La Trinidad.
Dinakamatna met a 6 a menor de edad nga agtawen iti 11 agingga 16 ti nakaaramid iti kaso a panagpangta.
Innayonna nga uppat met a CICL ti nakaaramid iti kaso a panagrames.
Naamuan a kaaduan kadagitoy ket naipasidong iti intervention babaen kadagiti social workers.
Nainget met latta ti koordinasyon ti PSWDO-Benguet iti pulisya tapnu marisut dagiti kaso a pakairamramanan dagiti menor de edad iti probinsia para iti panakaipaay ti kaskenan a tulong kadagiti menor de edad a makaar-aramid iti maikaniwas iti linteg.