Agarup walo a ribo nga operators ken draybers ti public utility vehicles a sigud a nagaplay para iti consolidation iti sidong ti PUV modernization program ti nagikkat.
Daytoy ket kalpasan ti uppat a pulo ket lima nga aldaw a pannakailaylayon nga impaay ti Land Transportation Franchising and Regulatory Board (LTFRB) para iti consolidation a nagpatinga idi Biernes, Nobiembre 29.
Sigun iti transport group a MANIBELA, innem a ribo a miembro dagitoy ken dua gasut a miembro ti PISTON ket nagikkat iti consolidation scheme.
Inlawlawag ni Mar Valbuena, MANIBELA chairman, a sigud a lima agingga innem a daras dagitoy nga agbibiahe iti makalawas ngem iti agdama ket agingga laeng iti dua a daras gaputa kayat ti dadaulo ti kooperatiba a dagiti moderno a lugan ti kangrunaan nga agbiahe.
Pangep ti dua a grupo a makikoordinar iti Department of Transportation (DOTr) tapno mapatganda nga agrehistro ken mapabaro ti prangkisa dagitoy numan pay saanda a nakonsolidate.
Iti agdama, awan pay ti komento manipod iti LTFRB ken DOTr.
