BAGUIO CITY – Mapatta-patta a nasurok 80,000 a turista ti simmang-at iti Baguio City sipud nangrugi ti holiday season.
Iti pannakiuman ti Bombo Radyo kenni Engr. Bonifacio Dela Peña, City Administrator, 50,000 agingga 70,000 laeng a bisita ti nagrehistro iti ‘visita app’ isut gapuna a saan pay a nainayon iti nasao a bilang dagiti saan a nagrehistro.
Gapu iti dayta, kinunana a napasaran ti bumper-to-bumper traffic nangrugi idi Disyembre baente kuatro agingga iti kaaldawan ti Paskua.
Dinakamat ni Dela Peña nga uray nailukat ti Kennon Road iti trapiko ket naobserbaran latta ti attidog a trapiko idiay Marcos Highway.
Impeksana pay nga agar-aramid dagitoy ti kanayonan a wagas tapno masolusyonan ti nasao a parikut.
Mainaig iti daytoy, inaklon ti nasao nga opisyal nga adda dagiti sumagmamano a nabiktima ti bogus a hotel ken accomodation establishments.
Inlawlawagna a dagitoy ket saan a nagrehistro iti VISITA Application a pakakitaan kadagiti lehitimo a hotel ken accomodation establishments.
Gapu iti dayta, al-allukoyen ni Dela Peña dagiti bisita nga agrehistro dagitoy iti VISITA Application nangruna nu planoda nga agtalinaed iti siyudad iti sumagmamano nga aldaw tapno saanda a mascam.//Rosemarie Bulsao
