BAGUIO CITY – Inwaragawag ti Women and Children Protection Desk ti Baguio City Police Office a kangrunaan a mailislistada ti injury wenno panagdangran.
Sigun kenni Police Captain Mercedes Bucalen, dadaulo ti nasao nga istasyon ti pulisya, dumanon iti 82 a kaso ti panagdangran kadagiti babbai iti nailistada manipod idi Enero agingga ita.
Kinunana a nangatngato ti nasao a bilang no idilig 61 a kaso ti panagdangran kadagiti babbai ken ubbing a nailistada iti kapada a panawen idi 2018.
Innayonna nga iti 22 a kaso ti panagrames a nailistada ket 7 ti naipasidong iti inquest proceeding bayat a 15 ti naipila iti korte.
Nakailistada met iti 20 a kaso ti panagabuso iti pisikal ken iti psycological a nakabiktimaan dagiti ubbing.
Nupay kasta, impanamnama ni Captain Bucalen a nainget ken agtultuloy ti koordinasyonda iti Department of Social Welfare and Development para kadagiti programa ken proyekto para kadagiti biktima nga ubbing ken babbai. (-Bombo Nikki Agsiweng)
