BAGUIO CITY – Nabigbig nga eigth placer iti PMA MABALASIK Class of 2019 ni Cadet 1CL Glyn Elinor Buansi Marapao manipud Lengaoan, Buguias, Benguet.
Iti panakiyuman ti Bombo Radyo, inaklon ti 22-anyos a kadete a nagbalin a karit kenkuana ti iseserrek ti manangna a ni 1Lt. Eda Glis Marapao iti Philippine Military Academy.
Innayonna a nagbalin pay a karit kenkuana ti panagbalin a third placer ni manangna iti PMA SALAKNIB Class of 2016.
Kinuna pay a no kabaelan ti kabsatna ket kabaelanna met a makagun-od iti kapada a pammadayaw.
Inaklonna nga adon a gundaway a napanunotna nga agbabawi iti iseserrekna iti akademya kabayatan ti kina-plebona nangruna ta narigat ti nagbalin a biagda iti uneg ti akademya gaputa kurang iti oras ti pannaturogda ken kanayonda a mabambannog iti panagsanay.
Nupay kasta, imbingayna a saan latta daytoy a nagpaabak kadagiti napasaranna a rigat ken ingaedna ti nagadal.
Saanna met a ninamnama a nakastrek iti Top 10 ti graduating class dagitoy.
Pinilina a sumrek ken agserbisyo iti Philippine Army a patienna a kapintasan a sanga ti Armed Forces of the Philippines.
Kabayatanna, saan a ninamnama ti inana a ni Mrs. Helen Marapao a makastrek ti anakna iti Top 10 ti klase dagitoy.
Kinunana a nangngeganna laeng ti damag babaen iti Bombo Radyo.
Innayonna a nalaos ti ragsakna iti balligi ti anakna.
Imbinglayna a sinuportaranda ti arapaap ti anakda a sumrek met laeng iti militar a kas iti asawana a maysa a retirado a master segeant ken ti inu-una nga anakna.
