BAGUIO CITY – Manamnama pay ti ad-adda a panagbaba ti temperatura iti Mt. Pulag National Park sadiay Kabayan, Benguet.
Kasaruno daytoy ti panakailista ti 9.0 degrees Celcius a kababaan a temperatura idi kalman iti bantay a maysa kadagiti kangrunaan a turturongen dagiti turista ita a holiday season.
Sigun kenni Protected Area Superintendent Teber Dionisio, tunggal malem ita ket mapaspasaran sadiay ti napuskol nga ulep nga ituntunda ti northeast moonson.
Kinunana a kaaduan kadagiti turista nga agturturong sadiay ti mangkayat a mangpadas iti nababa a temperatura ken iti nalammiis nga angin iti Mt. Pulag.
Inyunay-unay manen ti Mt. Pulag National Park and Protected Area Office kadagiti trekkers ken kadagiti turista a nasken a mangitugotda iti protective gears ken nasken pay a physically fit dagitoy sakbayda a sumang-at iti bantay.
Innayon ni Dionisio a nainget met ti panangbantayda iti Mt. Pulag tapnu maliklikan ti aniaman nga aksidente ken tapnu maipasigurado ti kinatalged dagiti sangaili.
Maibasar iti datus ti Kabayan Municipal Tourism Office, dumanon iti nasurok 22,000 a turista ti simang-at iti Mt. Pulag manipud Enero aginga iti agdama a bulan ken manamnama nga ad-adu pay a turista ti agturong sadiay kabayatan ti mapaspasungadan a Baro a Tawen.
Mabigbigbig ti Mt. Pulag kas maikatlo a kangatuan a bantay iti entero a Pilipinas.
