BAGUIO CITY – Nailista ti Baguio City idi kalman, February 21 ti 9.0°C a kababaan a temperatura para iti agdama a tawen 2020.
Immunan nga inlawlawag ni PAGASA-Baguio Weather Specialist Leticia Dispo a gapu daytoy iti epekto ti aktibo paylaeng a northeast monsoon wenno amian.
Maipalagip a nababbaba pay ti temperatura dagiti sumagmamano a munisipyo iti Benguet, Mountain Province ken Ifugao gapu iti mas nangatngato a lokasyon dagitoy.
Maibasar iti rekord, dinakamat ni Dispo nga adda iti 16°C-29°C ti temperatura sadiay Apayao bayat a 9°C-21°C sadiay Benguet, 12°C-24°C sadiay Ifugao, 15°C-25°C sadiay Kalinga ken 15°C-27°C sadiay Abra.
Manamnama met nga agpaut ti nababa a temperatura iti lokalidad agingga iti umuna a lawas ti Marso.
Maibasar iti rekord ti PAGASA, nailista ti 6.3°C a kababaan a temperatura ti City of Pines idi January 18, 1961 a sinaruno ti 6.7°C idi February 23, 1963 ken ti 6.8°C idi January 8, 1968.
