![](https://img.bomboradyo.com/baguio/2020/09/Slide8-1.jpg)
BAGUIO CITY–Malamlamayan ita ti 9-anyos nga ubing kalpasan a pimmusay iti panakauram ti pagtaengan dagitoy sadiay Sitio Monamon Proper, Monamon Sur Bauko Bauko, Mt. Province idi kalman.
Iti panakiyuman ti Bombo Radyo News Team kenni Fire Inspector George Calaoa ti Bauko Bureau of Fire Protection, kinunana a nangrugi ti uram pasado 5:00 ti malem kalman ken nasebseban daytoy kalpasan ti nasurok maysa nga oras.
Imbinglayna nga iti panagresponde dagiti kameng ti BFP-Bauko ket intero a nauram ti bungalow-type a pagtaengan gaputta naaramid dytoy kadagiti light materials.
Iti inisyal nga imbestigasion dagiti otoridad, nabati ti 9-anyos nga ubing ken ti kabsatna nga agtawen iti pito iti uneg ti pagtaengan da idi napasamak ti insidente bayat dagiti nagannakda ket adda iti talon.
Naamuan a saan a dagos a nakaruar dagiti agkabsat gapu iti kinapuskol ti asok nga intunda ti uram a nagresulta iti ipupusay ti 9-anyos nga ubing ken panakadangran ti 7-anyos a kabsat daytoy.
Dinakamat pay ni F/Ins. Calaoa a sumurok kumuran 100 a metro ti kaadayo ti naipasdekan ti balay iti highway ken naginaadayo dagiti babbalay sadiay rason a saan a dagos a nasebseban ti uram.
Naituding met a lamayan ti pamilya ti pimmusay nga ubing ti bankay daytoy iti las-od ti tallo nga aldaw.
Agtultuloy met ti imbestigasion dagiti maseknan nga otoridad seknan iti pakabuklan a danyos ken ti pudno a rason ti panakapasamak ti uram.
Kabayatanna, imbinglay ti opisial a daytoy ti kaunaan a kaso ti uram a nailistada iti nasao a lugar manipud pay idi Enero ti agdama a tawen.
Naituding met a mangipaay iti pinansial a tulong ti lokal a gobierno ti Bauko ken ti Department of Social Welfare and Development (DSWD).