BAGUIO CITY – Pimmusay ti maysa a 9-anyos nga ubing kalpasan a nalmes iti karayan sadiay Km. 4, Asin Road, Baguio City idi malem kalman.
Naamuan a nakaawat ti impormasyon ti Station 9 ti Baguio City Police Office mainaig iti kaso ti panakalmes iti nasao a lugar.
Dagus a nagresponde dagiti pulis ken mismo a ni PO3 Wilbert Depaynos ti naglangoy iti waig tapnu maingato ti biktima.
Iti panakiuman ti Bombo Radyo, kinuna ni PO3 Depaynos a narigatan daytoy a nangiguyod iti ubbing gaputa nauneg ti danum ti waig.
Maibasar iti report ti pulisya, manarimaan ti panagbuya iti telebisyon dagiti kakabsat ti biktima iti uneg ti balay dagitoy bayat ti panagay-ayamna iti ruar idi saandan a nangeg ti boses daytoy.
Naklaat met dagiti residente kalpasan a nakitana ti biktima iti karayan isut gapuna a dagus nga inyumanda daytoy iti kuerpo ti pulisya.
Dagus nga inyaon dagiti nagresponde a pulis ti biktima manipud iti karayan ken pinadas dagiti kameng ti Baguio City Emergency Medical Service nga ispalen ti biktima ngem napaay dagitoy.
