BAGUIO CITY – Malamlamayan ita ti bangkay ti maysa nga ubing a nalmes iti maysa a swimming pool sadiay Level 1300 wenno ‘Trese’ sadiay Poblacion, Itogon, Benguet idi kalman.
Nabigbig daytoy a ni Kurt Adrian Arguilles Ringor, 9-anyos, Grade 2 ken residente ti Sunny Side, Fairview, Baguio City.
Maibasar iti report, nakita ti kasinsinna ti biktima nga awanan puot iti uneg ti swimming pool.
Maatap a nalmes ti biktima nga agtayag iti tallo a kadapan iti swimming pool nga addaan kauneg a lima a kadapan.
Naamuan a bayat ti insidente ket makumikom amin dagiti kabagian daytoy ken awan ti nakadlaw a naglangoy ti biktima iti nauneg a paset ti swimming pool malaksid nga awan pay ti agbambantay a pool watcher idi napasamak ti insidente.
Maibasar pay iti report, immuna a naiturong ti biktima iti opisina ti Itogon Fire Station para iti first aid ngem naitaray daytoy iti BGHMC ngem naideklara a pimmusay daytoy.
