BAGUIO CITY – Nakemmeg ti siyam nga indibidual kalpasan a natiliwan dagitoy nga agpalpallot sadiay Purok 6, Irisan, Baguio City.
Nabigbig dagitoy a da David Menardo, 68; Richard Dong-as, 40; Romeo Lopez, 52; Fernando Lopez, 45; Robert Martinez, 45; Godofredo Gandalera, 52; Agustin Bucbucalon, 42; Jeffrey Palmis, 31 ken ni Rodrigo Toralba, 46, bin-ig a residente iti Baguio City.
Nakaawat dagiti pulis iti report mainaig iti maisaysayangkat a pallot wenno cockfighting iti nasao a lugar.
Nangisayangkatda a dagus iti operasyon a nagresulta iti panakakemmeg dagiti nasao nga indibidual.
Nakumpiskar ti 3 a sibibiyag a kawitan ken maysa a natay a kawitan, 10 a pidaso ti tari wenno natadem a banag para iti saka dagiti kawitan ken P1,300 cash.
Naipasidongen iti inquest proceeding ti nasao a kaso.
