BAGUIO CITY – Ad-adda pay a nanayonan dagiti naimbagan a pasiente ti COVID-19 ditoy siudad ti Baguio iti baet a nailista ti maysa a kabarbaro a kaso idi kalman.
Nakaruar manipud Baguio General Hospital and Medical Center (BGHMC) idi kalman ti siam a pasiente a pakairamanan ti walo a healthcare workers ken maysa nga OFW.
Maibasar iti kaudian a report ti lokal a gobierno, manipud iti 31 a pakabuklan a kaso ti COVID-19, nakarekoberen iti nasao a sakit ti 28 a pasiente, dua ti agpapaimbag ken maysa ti pimmusay.
Maipalagip nga idi kalman ket nagpositibo iti COVID 19 ti maysa a 41-anyos a pulis a residente ti Dontogan, Baguio City.
Maysa kadagiti kabaruan a nakarekober ni Dr. Elizabeth Macliing-Solang, Obstetrician-Gynecologist, agtawen iti 61, ken residente ti Sto Nino Road, Central Bakakeng, Baguio City.
Sipupuso a nagyaman ti doktor iti BGHMC ken kadagiti amin a timmulong iti panagpaimbagna.
Nakaawiden ni Dr. Solang ken dagiti kakadwana kalpasan a nagnegatibo dagitoy iti PCR swab test daytoy ngem impanamnamada a maipasidong pay dagitoy iti quarantine iti las-ud ti 14 nga aldaw ken aramidenda ti amin a protocols.
