BAGUIO CITY – Nadangran ken naiturong iti ospital ti siam nga indibidual kalpasan a natnag iti rangkis ti naglugananda a van sadiay Antadao, Sagada, Mt. Province idi kalman.
Sigun iti Sagada Municipal Police Station, ti nasao a lugan nga addaan plaka a UKY 402 ket inmaneho ni Ray Navalta Laureaga, agtawen iti 56, naasawaan, tubo ken residente ti Magallanes, Luna, La Union.
Nabigbig met dagiti nadangran a pasahero a da Lander Navalta, Carlo Butlig Navalta, Eleanor Navalta, Susana Butlig Navalta, Pamilo Espirito Navalta, Remylyn Butlig Navalta, Aquilino Butlig Navalta, Gloria Niro Laureaga ken Eric Opinia nga agkakapamilia ken agpapada a tubo ken residente ti Magallanes, Luna, La Union.
Maibasar iti report, paturong ti van sadiay Bontoc kalpasan ti panagpasiar dagiti pasahero sadiay Sagada idi naawanan iti preno ti lugan a nangitunda iti pannakatnag daytoy iti rangkis nga aaddaan kauneg nga agarup 40 metro.
Gapu iti nasao nga aksidente ket agpalpalagip manen ti pulisya iti panagannad dagiti motorista tapno makaliklik dagitoy iti aksidente nangruna ita a holiday season.
