BAGUIO CITY – Nailista manen ti rehion Cordillera ti 43 a baro ken kanayonan a kaso ti COVID-19 nga addaan ti maysa nga ipupusay idi kalman, August 15.
Nairekord ti Baguio City ti 26 kadagiti nasao a baro a kaso ti COVID-19 ken maysa nga ipupusay gapu iti nasao a sakit.
Manipud kadagiti 27 a kabaruan a nagpositibo iti COVID-19 ditoy Baguio, 22 ket nakapulapol dagiti pasyente nga immunan a nagpositibo iti nasao a sakit bayat a tallo ti resulta ti expanded testing ken dua ti walk-in patients a nakapasar ti sintomas.
Naamuan a walo kadagiti baro a kaso ti COVID-19 iti siudad ket bin-ig nga ubbing, no sadino, adda ti 1-year-old, 2-year-old, dua a 4-year-old, 9-year-old, 11-year-old ken 12-year-old a bin-ig a lallaki malaksid pay iti balasitang a 17-years old.
Ti met maikapito a pimmusay iti siudad gapu COVID-19 ket maysa a 67-anyos a lalaki a residente ti Kennon Road nga addaan ti dadduma a sakit.
Iti pakabuklan, addaanen ti Baguio iti 242 a nagpositibo iti COVID-19 a bukbuklen ti 108 nga aktibo a kaso.
Kabayatanna, nailista met ti Benguet ti uppat a baro a kaso ti COVID-19, no sadino, tallo ti residente ti La Trinidad bayat a maysa ti residente ti Tuba.
Maibasar iti rekord, dagiti nagpositibo sadiay La Trinidad ket 4-year old a babai, 27-year-old a babai ken 27-year old a lalaki a bin-ig a residente ti Lubas bayat ti nagpositibo sadiay Tuba ket 26-year-old a babai a residente ti Sahava, Taloy Sur nga addaan travel history sadiay Rosales, Pangasinan.
Kabayatanna, nailista met ti Kalinga ti 12 a baro a kaso ti COVID-19 idi kalman, pakairamanan ti maysa a 50-anyos a babai a reisidene ti Dalawig, Alcala, Cagayan.
Naamuan a naipasidong daytoy iti swab test sadiay Tabuk City gaputa maysa daytoy kadagiti nakapulapol dagiti nagpositibo iti COVID-19 ti maysa a religious congregation sadiay Bulanao Norte.
