BAGUIO CITY – Nalaus ti kinaragsak ti atleta ti rehion a nangabak iti gold medal iti Taekwondo Poomsae – Elementary Division iti manarimaan a Palarong Pambansa 2017.
Iti panakiuman ti Bombo Radyo kenni Khyla Guinto, kinunana a daytoy ti kaunaan a gundaway a nakipaset daytoy iti Palarong Pambansa.
Ni Khyla ket 9 years old nga estudyante ti H.O.P.E. Christian Academy sadiay La Trinidad, Benguet.
Kinunana nga agtawen daytoy iti nasurok innem idi nangrugi iti taekwondo babaen iti panang-enroll kenkuana ti inana iti nasao nga ay-ayam ken sakbay ti Palaro ket nainget ti nagbalin a panagsanayna.
Innayonna a naiyaplikarna ti insuro ti coach-na kenkuana iti nagbalin a performace daytoy iti taekwondo poomsae.
Saan met a nagbalin a parikut iti panagadalna ti nagbalin a panagsanayna para iti Palaro.
Naamuan pay a kaduana ti inana sadiay Antique a venue ti ay-ayam ita a tawen.
Nagyaman met ni Khyla iti suporta kenkuana dagiti kaadalan, gagayyem ken iti kapamilyana.
Naituding a makaawat daytoy iti insentibo manipud iti DepEd-Cordillera a dumanon iti P3,000.
