BAGUIO CITY – Manamnama a ngumato ti occupancy rate kadagiti hotel and accomodation establishments iti Baguio City kagiddan ti umadanin a holiday season partikular inton Disyembre 27 agingga Disyembre 28.
Iti interview ti Bombo Radyo kenni Andrew Pinero, Information Officer ti Hotel and Restaurants Association – Baguio, kinunana a napintas ti tourist arrival iti agdama isu’t gapuna a namnamaen dagitoy ti dakdakkel pay a bilang dagiti turista nga agturong iti siudad.
Iti agdama ket 80% agingga 85% ti occupancy rate kadagiti hotel and accomodation establishments iti siudad.
Sigun kenni Pinero, dakkel daytoy a banag para kadagiti business owners gapu ta makasubbotda manipud iti panakalugida iti naglabas a pandemya.
Impeksa ti nasao nga opisyal a naobserbaran ti umad-ado a bilang dagiti negosyante a mangipaspadek ti balay-pagdagusan iti siudad.
Kabayatanna, binigbig ni Pinero dagiti programa ti gobyerno kas ti anti-road obstruction a makatulong tapno maliklikan dagiti illegal parking.
Guyguyugoyenna met dagiti hotel and accomodation establishments a palawaenda pay ti parking areas dagitoy tapno maakomodar amin dagiti bisita dagitoy.//Rosemarie Bulsao
