BAGUIO CITY – Naka-lockdown ita ti PNPTI Cordillera Administrative Region Training Center a masarakan ditoy siudad ti Baguio kalpasan a nailista sadiay ti outbreak ti COVID-19.
Sigun kenni Mayor Benjamin Magalong, nagpositibo iti COVID-19 ti 98 a non-commissioned officers ti PNP kabayatan ti manarimaan a leadership courses/training dagitoy iti nasao a training center.
Kinunana a karaman dagitoy iti grupo dagiti 197 regular officers a nagtaud iti nagduduma a rehion a maipaspasidong ti leadership training iti PNPTI CARTC ken kaaduanna ket nagtaud iti Cordillera Region.
Innayonna a posible a manayonan ti nasao a bilang gaputa manarimaan ti testing ken contact tracing.
Sigun iti mayor, kaaduan kadagiti nakaptan ti nasao a sakit ket makapaspasar ti mild symptoms ken addada ita iti isolation bayat a naka-quaratine dagiti close contacts dagitoy ken naisayangkaten ti disinfection.
Inaklonna metlaeng nga adda ti sumagmamano a panagkurang ti training center kas iti nakapoy a ventilation kadagiti barracks ken silid pagadalan dagiti pulis, malaksid pay iti panakalabsing ti social distancing.
Nangipatulod metten daytoy iti official reprimand iti dadaulo ti PNPTI CARTC gapu iti nasao nga insidente.
Agpaut iti 14 nga aldaw ti lockdown ti training center ken nasuspindir amin nga aktibidad sadiay.
Maipalagip nga idi October 2020 ket adda metlaeng ti kapada nga outbreak iti maysa pay a training center ditoy siudad no sadino, nasurok 200 a baro a police recruits ti nagpositibo iti COVID-19.
