BAGUIO CITY-Manamnama a maipila ita a lawas ti kaskenan a kaso kontra iti suspek iti panagpabettak ti granada sadiay La Paz, Abra idi napalabas a bulan ti Enero.
Sigun kenni Cordillera PNP Regional Director PCSupt. Edward Carranza, nabayagan ti panakaipila ti kaso kalpasan a nabigbig ti suspek gaputa pinagtiponda pay ti salaysay dagiti testigo.
Maipalagip nga iti parbangon ti Enero 25 ket dua a pulis ti pimmusay bayat a 25 ti nadangran pakairamanan ti agasawa a da Abra Representative Joseph Sto. Niño Bernos ken La Paz Mayor Menchie Bernos kalpasan a pinabettak ti suspek ti maysa a granada kagiddan ti panagbuya dagiti tattao iti fireworks display a paset ti panagleppas ti festibidad sadiay
Sigun kenni Carranza, posible a nakinayon ti suspek iti kaaduan ti tattao ken bayat ti panagrugi ti fireworks display ket imbarsakna ti mapapati nga Mk 2 Mk.II fragmentation hand grenade iti asideg ti stage nga ayan dagiti biktima.
Innayonna a dua a levers ti mapapati a granada ti narekober iti nasao a disso.
Iti agdama ket saan pay laeng a mabalin a maiwaragawag ti pakabigbigan ti suspek iti nasao a panagpabettak.
Kabayatanna, impannakkel pay ti dadaulo ti Cordillera PNP nga agtaltalinaed a maysa ti rehion kadagiti katalnaan ken kakappiaan iti entero a pagilian nangruna ta isolated case ti napasamak sadiay Abra.
