BAGUIO CITY – Inyapela ni Baguio City Mayor Benjamin Magalong ti panaka-awat dagiti residente iti Padre Burgos iti pagkasapulan iti panaka-aramat ti sigud a Santo Niño Hospital kas treatment facility ti COVID-19.
Iti panakipatang ti mayor kadagiti residente ti nasao a lugar, impettengna a ti panggep ti nasao nga addang ket ti panakaispal ti siudad manipud iti makapapatay a sakit.
Inyunay-unayna a ti nasao a pasdek ti kapintasan a nakitada a mabalin a maaramid a pasilidad para kadagiti pasyente a makaptan ti COVID-19.
Kagiddan iti daytoy, impanamnamana nga awan ti maisakripisyo iti panaka-aramat ti nasao a pasdek kas containment facility ti COVID-19 gaputa maipangruna ti kinatalged met dagiti health heath workers, dagiti pasyente ken dagiti agnanaed iti aglawlaw.
Dinakamatna nga adda ti standards a masursurot kas iti tallo a lawas a preparasyon ti pasdek ken ti panakabukel ti agbalin a sistema ti pasilidad.
Sigun pay iti mayor, posible a mangrugi ti operasyon ti pasilidad kalpasan ti tallo a lawas iti kanito nga awan ti makita ti madutukan a third party evaluator iti panaka-aramat ti pasilidad.
