BAGUIO CITY – Nakaawat iti saan a napintas a reaksion manipud kadagiti puraw dagiti Pilipino nga agnanaed ita sadiay Manitoba, Canada kalpasan a naduktalan a ti uppat a kaunaan a positibo a kaso ti COVID-19 sadiay ket bin-ig a Pinoy.
Iti report iti Bombo Radyo Baguio ni Bombo International Correspondent Jogin Tamayo manipud iti Winnipeg City, sadiay Manitoba, Canada, naamuan nga imbes nga ag-self quarantine dagiti nasao a Pinoy apaman a nakasublida sadiay manipud iti panagbakasyonda ditoy Pilipinas ket dagus nagtrabaho ken nagpasyar dagitoy.
Nupay awan ti panagdangran a napasamak, kinuna ni Tamayo nga adda dagiti sao a nangnanggegda a nangpasakit iti riknada ken adda pay dagiti naungtan a Pinoy a gapu kadagiti Pinoy ket naaddaan ti kaso ti COVID sadiay Manitoba, Canada.
Nupay kasta, kinunana nga ita ket awanen ti nasao a trato kadagiti Pinoy sadiay.
Kabayatanna, kinuna ni Bombo International Correspondent Ana Liza Dapidap, OFW sadiay Madrid, Spain nga adda ti maysa a Pinoy sadiay a nagpositibo iti COVID, partikular sadiay Barcelona ngem nakarekoberen daytoy.
Sadiay met United Kingdom, makaaw-awat latta iti napintas a suporta dagiti OFWs nangruna ta kaaduan kadagitoy ket agtatrabaho iti health sector.
Nupay kasta, kinuna ni Bombo International Correspondent Marben Tanacio Orfiano, medical technologist iti Homerton University Hospital sadiay East London a kangrunaan nga apektado iti COVID-19 pandemic sadiay UK dagiti undocumented nga OFWs.
Innayonna nga addan ti maysa a 36-anyos a Pinoy a pimmusay sadiay UK bayat nga adda ti dua a nurse nga unconfirmed case gaputa napaawid dagitoy ken naibilin ti panag-self isolate dagitoy kalpasan a manageable sign and symptoms ti narikna dagitoy.
Dinakamatna pay a maysa kadagiti dua a nurse ti taga-Cordillera.
Kabayatanna, saan metten a makaawid dagiti OFWs sadiay Thailand kalpasan a napawilan ti panagbiahe paruar iti nasao a pagilian gapu iti panag-lockdown daytoy gapu iti agtultuloy a panagngato ti kasoda iti COVID-19.
Sigun kenni Bombo International Correspondent Derick Don Sumingwa, epektibon ti home quarantine kadagiti amin nga agnanaed sadiay Thailand ken adun dagiti pagalagadan nga impaulog ti gobyerno sadiay, pakairamanan ti curfew, panakaipawil ti aniaman a taripnong ken ti panakalimitar ti media reports.
