BAGUIO CITY – Agtungpal dagiti stakeholders iti La Trinidad Vegetable Trading Post iti intuding ti Benguet Provincial Inter-Agency 2019 Novel Corona Virus (nCov) Task Force a clustering dagiti munisipyo nga agitulod iti natengda iti La Trinidad Vegetable Trading Post ken iti Benguet Agri-Pinoy Trading Center nga ag-epekto ita nga aldaw, April 8.
Iti interview ti Bombo Radyo Baguio kenni Agot Balanoy, panakabagi ti liga dagiti asosasyon iti La Trinidad Vegetable Trading Post, kinunana nga agtungpalda iti Memorandum Cirular para iti nasao a banag ngem nasken met a silulukat ti inter-agency task force no bilang adda dagiti nasken a mabaliwan iti nasao a clustering.
Sigun kenkuana, saan gamin a nakonsulta dagiti stakeholders iti trading area nga ayan dagitoy.
Inlawlawagna a kasapulan ti rotation iti nasao a clustering gaputa iti vegetable trading ket adda dagiti aldaw iti makalawas a saan a napintas ti panaglako ti nateng ken adda met dagiti aldaw a napigsa ti panaglako ti nateng.
Dinakamatna a kaasi dagiti naka-schedule iti Tuesday-Thursday-Saturday gaputa kadawyan a nakapoy ti panaggatang iti nateng tunggal Tuesday ken Saturday.
Innayonna a saan met a patas no dagiti laeng nadutukan iti Monday-Wdnesday-Friday ti agganansia nangruna ta kadawyan a Wednesday ken Friday a napigsa ti panaggatang iti nateng.
Kidkiddawen metlaeng dagiti mannalon ti panakailaksid iti nasao a clustering dagiti agitultuloy ti nagduduma a nateng kas iti brocoli, cauliflower, beans ken sweet peas gaputa bassit metlaeng ti kaadu dagitoy ken manmano ti munisipoyo a pagtataudanda.
Binabalaw pay ni Balanoy ti panakagrupo dagiti munisipyo gaputa nagnanayon ti Buguias, Atok ken Tinoc a pagtataudan dagiti kadakkelan a volume dagiti nateng a repolyo, karot ken wombok.
Inlawlawagna a kaaduan iti mula a nateng ti Buguias ken saan nga umdas ti tallo nga aldaw iti makalawas tapnu mailako ti apit dagitoy.
Innayonna nga inton bigat ti maudi a volume purchase dagiti buyers iti nateng para ita a Holy Week ken agsublin ti panaggatang inton Dominggo.
Gapu iti daytoy, iyap-apela ni Balanoy a kalpasan ti makalawas nga implementasyon ti clustering ket adda ti maisayangkat nga assessment ken mapaayaban dagiti stakeholders ti vegetable industry tapnu makonsulta ken mangipaay iti pudno a ladawan ti mapaspasamak iti transaksion dagiti nateng.
