BAGUIO CITY-Makipagladladingit ita ni Baguio City Mayor Benjamin Magalong ken ti sibubukel a lokal a gobyerno ti siyudad iti ipupusay ni sigud a Benguet Electric Cooperative ( BENECO) General Manager Gerardo Verzosa.
Iti waragawag ti mayor, dakkel ti nagbalin nga akem ni Verzosa iti panagbalin ti BENECO kas maysa kadagiti kasayaatan nga electric cooperatives iti pagilian no maipapan iti panakaidaon ti koryente kadagiti nasulsulinek a lugar, panakapadur-as ti komunidad ken iti panakaipatungpal dagiti dadduma pay a pagrebbengen ti kooperatiba iti kagimungan.
Malaksid kenni Mayor Magalong, impeksa met dagiti opisyal ti kooperatiba ti panakipagladingitda iti pamilya Verzosa.
Immuna iti daytoy, kinuna ni PMaj. Cleff Vencio, iti panakiuman kenkuana ti Bombo Radyo Baguio a nakaawatda iti awag manipud iti Pines City Doctor’s Hospital idi malem kalman a naiturong sadiay ni Versoza gapu iti tama ti bala ti paltog.
Kinunana a sigun iti insalaysay ni Candido Versoza, anak ti pimmusay, a nadanunanda a dara-dara ti amada a nakatugaw iti sangwanan ti lugan dagitoy.
Dagus nga intarayda daytoy iti pagagasan ngem naideklara daytoy a ‘dead on arrival’.
Naduktalan met a nagsagrap ni Engr. Versoza iti tama ti bala ti paltog iti kanigid a barukongna.
Kabayatanna, agkidkiddaw met ti pamilya Versoza iti ‘privacy’ ken panakaawat ti publiko seknan iti insidente bayat nga agladladingit dagitoy.
