BAGUIO CITY – Ipalpalagip manen ti City Health Services Office ti Baguio ti panangpatalinaed dagiti umili iti napintas a salun-at kagiddan ti manarimaan a ‘BER’ months tapnu maliklikan ti panakaimpeksion iti nagduduma a sakit, pakairamanan ti COVID-19.
Sigun kenni City Health Officer Dr. Rowena Galpo, posible a ngumato pay ti kaso ti COVID-19 ita a limmam-ek ti panawen nangruna ta punpuntiryaen ti coronavirus ti respiratory system.
Imballaagna a ti nalam-ek a klima ita a bulan ti Oktobre agingga inton Pebrero ti maysa kadagiti agbalin a rason iti panagngato ti kaso ti COVID-19 ditoy siudad.
Gapu iti daytoy, kinunana a nasken a siguraduen a saan a malamminan ti bagi bayat ti lam-ek, agihersisyo ken maaddaan ti nasalun-at ken nasayaat a wagas ti panagbiag.
Dinakamatna a makatulong met ti regular a panagpabakuna kontra iti trangkaso ken pneumonia nangruna dagiti agtawen ti 50 nga agpangato gaputa dagitoy ti narisgo iti sakit.
Inyunay-unayna pay ti panagtungpal iti minimum health standards kontra iti COVID-19 ken ti dagus a panagkonsulta iti doktor dagiti makapaspasar ti aniaman a sintomas.
