BAGUIO CITY – Nangilatang ti lokal a gobierno ti La Trinidad, Benguet iti P1-M para iti markings ken signages a mainutar kadagiti kalkalsada sadiay.
Sigun kenni Mayor Romeo Salda ti nasao nga pondo ket nagtaud iti saan nga naar-aramat nga pondo idi tawen 2019.
Dinakamatna nga nalpasen iti procurement dagitoy ken nakikoordinarda metten iti Department of Public Works and Highways tapnu tumulong a mangimuntar kadagitoy.
Sigun kenkuana, malaksid iti road barrier nga as-asikasuenda ita ket iprioridadda metlang ti panangikabil kadagiti singnages ken markings iti amin nga kalkalsada .
Manannama met a mairugi daytoy inton umay a bulan iti Nobyembre kaggidan iti panakapirma ti kontrata ti proyekto.
Namnamaen met ti lokal a gobierno a babaen kadagitoy a signages ket mapalukayen ti garaw iti trapiko ken maliklikan dagiti vehicular traffic accident a mapaspasamak iti masakupan dagitoy.
Maipalagip nga tallo a nagsasaruno nga taffic accident ti napasamak sadiay itay laeng nabiit ngem ngem inyunay-unay ni Major Cleff Vencio a saan nga dagiti road barriers ti makagapu nu kitdi gaputa adaan dagitoy iti impluwensya iti arak.
