BAGUIO CITY – Nagduduma nga aktibidad ti naisaganan para iti panakarambak ti maika-30 a panakarambak ti Library and Information Services Month inton sumaruno a bulan ti Nobyembre nga addaan tema a Libraries Relate, Engage, Advocate, Lead wenno LibREAL.
Kinuna ni City Librarian officer-in-charge Easter Wahayna-Pablo a karaman kadagiti nasao nga aktibidad ti pa-trivia, online storytelling, poetry reading ken Parent and Child Online Storytelling Contest.
Kinunana nga amin dagitoy ket addaan ti naituding nga aldaw a pakaisayangkatanda ken maipablaak iti social media page ti opisina.
Imbingay pay ni Wahayna-Pablo nga adda latta dagiti serbisyo nga ipapaay ti city library iti baet ti agdama a pandemya.
Dinakamatna a karaman kadagiti nasao a serbisyo ti E-Skwela Hub ken ti online registration para iti Library In-house Use ken Public Library Virtual Reference Assistance no sadino, dagiti kasapulan nga impormasyon ket maipatulod babaen iti messenger wenno e-mail.
