BAGUIO CITY – Nakaawat iti tulong pinansial ti agarup 180 a barangay frontliners manipud iti sumagmamano a babbarangay ti Tuba, La Trinidad ken Sablan babaen iti Assistance to Individuals in Crisis Situation (AICS) Program ti provincial government ti Benguet.
Mangnamnama met ni Governor Melchor Diclas a makatulong ti naited a pinansial kadagiti frontliners a dakkel a katulongan ken nangited tulong iti kampanya ti probinsia kontra iti agdama a krisis.
Pinagyamananna pay dagiti amin nga agtatrabaho iti frontlines iti agdama a pandemya.
Naamuan a dagiti 180 ket karaman iti maikadua a batch dagiti kwalipikado a benipisaryo iti nasao a programa.
Kabayatanna, agrikos met ti provincial government ti Benguet babaen iti Office of the Provincial Social Welfare and Development (PSWDO) kadagiti barangay iti probinsia tapnu ited ti tulong pinansial kadagiti kwalipikado a barangay fontliners ken dadduma a narisgo nga indibidual a saan pay a nakaaw-awat ti aniaman a tulong pinansial manipud iti gobyerno.
Immunan a nabigbig dagiti kwalipikado a benipisaryo babaen iti nagduduma a municipal social welfare and development offices ken inadal ti PSWDO.
