Baguio City – Maamak itan ti lokal a gobierno ti La Trinidad, Benguet a mangituloy iti mass testing kadagiti residente sadiay gapu iti agtultuloy a panakailista ti kaso ti COVID-19 sadiay.
Iti interview ti Bombo Radyo Baguio, kinuna ni Mayor Romeo Salda a napunnpuno itan dagiti quarantine facilities ti munisipyo isut gapuna a no mabalin kuma ket isardengda paylaeng ti manarimaan a mass testing sadiay.
Kinunana a napunnon ti Benguet General Hospital kadagiti pasyente a nagpositibo iti COVID-19 ken uray pay dagiti evacuation centers a naisagana para kadagiti indibidual a makaptan iti coronavirus.
Innayonna a gapu ti kinakurang dagiti isolation facilities iti La Trinidad ket maipaspasidongen iti home isolation dagiti 30 nga indibidual.
Dinakamatna a manipud iti 800 a puntiryda a maipasidong iti mass testing ket 450 laeng ti nalpas ken manipud iti nasao a bilang ket 12 dagiti nagpositibo bayat a maur-uray paylaeng ti resulta dagiti 170 a dadduma pay.
Iti baet ti pakaseknanda, kinuna ni Mayor Salda nga awan met ti parikut iti suplay ti family food packs a maipapaay kadagiti naipasidong iti lockdown ken na-isolate nga indibidual.
Innayonna nga umdas paylaeng ti bilang dagiti contact tracers ti La Trinidad a mangisaysayangkat ti contact tracing kadagiti indibidual a nakapulapol dagiti immunan a nagpositibo iti COVID-19 sadiay.
