BAGUIO CITY – Mangnamnama ti tourism industry ditoy Baguio a kadagiti sumarsaruno a bulan ket adda ti dakkel a pagbaliwan dagiti polisiya ti siudad mainaig iti turismo.
Iti panakiyuman ti Bombo Radyo Baguio, kinuna ni Andrew Pinero, panakangiwat ti Hotel and Restaurant Association of Baguio (HRAB) nga agtultuloy ti nabuntog ngem in-inot a panagsaranta ti turismo ti siudad babaen kadagiti sumangsangpet a bisita ken dagiti umili iti lokalidad.
Dinakamatna a maragsakan ti tourism industry nupay bassit dagiti sumangsangbay a turista manipud iti nagduduma a paset ti Luzon.
Kinunana a regular met ti panangadal ni Mayor Benjamin Magalong kadagiti pagalagadan seknan iti turismo ti siudad ken luklukayan daytoy ti polisiya nangruna no makita ti panagtungpal dagiti turista kadagiti maikalkalikagum tapnu makastrekda ditoy siudad.
Impanamnama pay ni Pinero a saan a maikompromiso ti salun-at ken kinatalged dagiti umili ti Baguio iti panakapalukay dagiti polisiya para iti iseserrek dagiti turista ditoy siudad.
