BAGUIO CITY – Intuloy manen ti dua a dams iti Benguet ti panagkissayda ti danum iti maikatlo nga aldaw kalpasan a ngimmato ti lebel dagitoy gapu iti panagtudtudona nga intunda ti bagyo nga Ulysses.
Maibasar iti advisory ti Hydro-Meteorological Division ti DOST- PAGASA, naisayangkat manen ti spilling operation ti Binga Dam sadiay Itogon ken Ambuklao Dam sadiay Bokod.
Nagtalinaed a walo a gates ti Ambuklao Dam ti nailukat iti kangato a sag-4 meters bayat nga innem a gates iti Binga Dam iti kangato a sag-3.5 meters.
Kinuna ti ahensia nga agpada nga adda iti kritikal a kasasaad ti dua a dam nupay awan ti nakaro nga epekto ti panagibulos dagitoy ti danum.
Iti 8:30 ita nga agsapa ket addan ti water level ti Ambuklao Dam iti 751.13 meters bayat a ti Binga Dam ket addan iti 573.34 meters.
